რომელია სწორი ფორმა?

info@ena.ge-ზე შემოსული მოსაზრება:

მოგესალმებით. ფართოდ არის გავრცელებული არასწორი ფორმები "თვისობრივი", "თვისობრიობა" და ა.შ.
კარგი იქნება, თუ არასწორ ფორმებში შეიტანდით.
ბიძინა რამიშვილი

გამარჯობა არ არის ზმნა, ამდენად, მას არ სჭირდება –თ ბოლოსართი (გამარჯობათ), მკაცრი გრამატიკული წესების მიხედვით ეს გაუმართლებელია, მაგრამ ბოლო დროს ამ ფორმას მაინც გაუხსნეს გზა და თავაზიანი მიმართვის დროს მის გამოყენებას არ კრძალავენ. ამდენად, ორივე ფორმა – გამარჯობა, გამარჯობათ – მართებული გამოდის, ამის გამო ჩვენს ლექსიკონში ვერ წარმოვადგენთ გამარჯობათ ფორმას, როგორც არასწორს და მის მართებულ ვარიანტად ვერ მივუთითებთ გამარჯობა–ს. აქედან გამომდინარე ვერ იპოვეთ ეს ფორმები ლექსიკონში – მათ მცდარი ვარიანტი არა აქვთ (თუ ხელოვნურად არ მოვიფიქრებთ რამეს, ვთქვათ ასეთს: გიმარჯობათ ან გუმარჯობათ და სხვ. ამ გზით, რა თქმა უნდა, ვერ წავალთ).

ბატონო ბიძინა!
''თვისებრივი'' და ''თვისობრივი'' თოფურია-გიგინეიშვილის ორთოგრაფიულ ლექსიკონში პარალელურ ფორმებად არის წარმოდგენილი, ანუ, ორივე ფორმა სწორად და მისაღებად არის მიჩნეული - ''თვისობრივი'', ''თვისობრიობა'' სამეცნიერო მიმოქცევაში საკმაოდ გავრცელებული და დამკვიდრებული ფორმებია; ამდენად, ჩვენც დავუშვით ეს სიტყვები (თავიდან თავი შევიკავეთ, მხოლოდ ''თვისებრივი'' ვარიანტი გვქონდა), თქვენი წერილის მერე მაინც დამატება უფრო ჩავთვალეთ მიზანშეწონილად, ვიდრე მათი გატანა არასწორ ვარიანტებში).

დიდი მადლობა ყურადღებისთვის!

მართებულია: 15-დღიანი, 10-წლიანი...

info@ena.ge-ზე შემოსაული კითხვა:

სიტყვა \"ნახული\" სწორადაა ნახმარი?
ეს ფილმი ნახული მაქვს. <<<<< სწორია თუ არა? თუ სწორია, რ. განსხვავება იქნებოდა სიტყვა ნანახი რომ გამომეყენებინა?

პასუხი:
თოფურია-გიგინეიშვილის ორთოგრაფიულ ლექსიკონში გვხვდება ორივე ფორმა: ერთი მხრივ, ნახულ-გაგონილი, ნახული, ნახულ-ნაგრძნობი, ნახულ-ნასმენი, მეორე მხრივ, ნანახი, ნანახ-ნაგრძნობი. თქვენ მიერ წარმოდგენილ კონტექსტში აშკარად უფრო გამართული და გამართლებულია ''ნანახი'': ''ეს ფილმი ნანახი მაქვს'' (შდრ. "არნახული წარმატება" და სხვ.).

გამარჯობა,

თქვენს ვებსაიტზე მოძიებული "ქართული ენის გრამატიკის ელექტრონული სისტემის v.1" მიხედვით, წიგნების, ჟურნალ-გაზეთების, მხატვრული ნაწარმოებების, ორგანიზაციების სახელები ბრჭყალებში ჩაისმის. გვაინტერესებს:

a) უნდა გამოვიყენოთ თუ არა ბრჭყალები იმ შემთხვევაშიც, თუ ამ სახელების მოხსენიება გვიწევს ლათინური ასოებით, მაგ.: "Microsoft",
b) ბრუნვის ნიშანი უნდა დავურთოთ თუ არა სიტყვის სახელობით ბრუნვაში გამოყენებისას, მაგ.: "Microsoft"-ი, და
c) მოთხრობით ბრუნვაში "S&P" (რომლის ტრანსკრიფციაა "ეს-ენდ-პი", და ამავდროულად რომელიც იშიფრება როგორც "Standard and Poor's" ანუ "სტანდარდ ენდ პურს"-ი) ბრუნვის რომელი ნიშანი უნდა გამოვიყენოთ, "-მა" თუ "-მ"

მადლობა წინასწარ.